Landjugiprogramm Oktober bis Dezember 2018

Spass, Abwächslig und cooli Erläbniss si garantiert! Mir fröie üs uf Di!

  

Oktoberfest Stuttgart: Fritig bis Sunntig, 5. bis 7. Oktober 2018

Mir si parat für Dirndl, Lederhosen und gaaaaanz viu Bier! Die agmäudete Persone überchöme d Infos direkt vo Hirsbrunner Carreisen. Ds wird es wahnsinns Wucheend J.

 

Escape Room: Zistig, 16. Oktober 2018

Mir wei üs ume einisch es paarne Rätsu und verschlüsslete Code-Wörter steue. Treffpunkt 19:45 im Boll. Amäude bis am 9. Oktober bim Simu.

 

Schwandfest: Fritig u. Samschtig, 26. u. 27. Oktober 2018

Ds legendäre Fescht vor Landjugend Larutia… Mä trifft sich ar Bar.

 

HIT: Samschtig u. Sunntig, 27. u. 28. Oktober 2018

Ds Herbstinfoträffe vom SLJV fingt das Jahr in Gams statt. Düre Tag gits ä Tanzkurs, ä Burehofmeisterschaft und ä Besichtigung vore Strafastalt. Am Abe Party hard mit Landjügeler us dr ganze Schwiz! Wär gärn möcht derbi si söu sich bis am 19. Oktober bim Marc mäude. Wemer gnue Lüt si näme mir de öppe grad dr Party Bus J.

 

Volleyball Turnier: Sunntig, 4. November 2018

Üsi Landjugi organisiert o das Jahr wieder ds Volleyball Turnier für d Landjugis vor Region West. Bi üs geits das Jahr um d Titelverteidigung! Wär gärn würd cho spile söu sich bim Marc mäude. Am 24. und 31. Oktober tüe mir am 20:00 Uhr ir Turnhalle ds Utzige trainiere.

 

Oenztalparty: Samschtig, 10. November 2018

Die Party mit super Shot-Bar dörfe mir nid verpasse. Träffpunkt isch am 21:00 Uhr im Clubrum. Dass mir üs perfekt chöi druf vorbereite tüemer ab 20:00 Uhr im Clubrum afä chli vorglühe.

 

Schoggi Workshop: Mäntig, 12. November 2018

Hani daa Schoggi ghört…?? Ds cha ja nume guet wärde! Mir gö säuber ga Schoggi Tafele mache. Treffpunkt am 18:45 im Boll. Amäude bis am 8. November bim Marc.

 

November Loch Chilbi: Fritig u. Samschtig, 16. u. 17. November 2018

Ds Fescht vor Landjugend Niesen fingt in Aeschi b. Spiez statt. Es sig schiins immer e riese Party wome unbedingt mau sött ga verbi luege.

 

Vougas Party: Fritig u. Samschtig 16. u. 17. November 2018

Am gliche Wucheend fingt o no d Party vo dä Chiubi Giglä ds Kirchdorf statt.

 

Laser Tag: Sunntig, 18. November 2018

Das mau gömer ds Mamishaus nid ga Paint Ball spile sondern Lasertag. Treffpunkt 11:15 im Boll. Amäude bis am 9. November bim Simu.

 

Openair-Fondue: Samschtig, 24. November 2018

Mir träffe üs am 19:00 Uhr bim Clubrum und gö när zur Landjugi Rüegsbach ga Fondue ässe.

 

Steizyt-Party: Samschtig, 24. November 2018

Am gliche Abe fingt ono ds Fescht vor Landjugend Heimiswil statt.

 

Güetzele: Donnstig, 29. November 2018

Mir starte um 19:00 Uhr ir Chochschueu im Boll. Es wär natürlech super, we dr eint oder anger Teig scho grad chönnt mitbracht wärde, für d Sablé gschider nid ds viu Anke verwände J. Bitte bir Caroline mäude.

 

Region West Fondue: Fritig, 30. November 2018

Ds Fondue ässe mit de Landjugis vor Region West fingt das Jahr bir Landjugend Thal in Solothurn statt. Bi Intresse bim Marc mäude.

 

Hauptversammlung: Samschtig, 1. Dezember 2018

Scho die 52. HV fingt das Jahr statt. Mir fröie üs uf müglechscht viu Mitglieder und Nöimitglieder. We dir öpper kennet wo o gärn würd id Landjugi cho, unbedingt grad mitnäh. Gnaueri Infos fingsch uf dr bigleite Iladig.

 

Chlousehöck: Donnstig, 6. Dezember 2018

Mir lade d Landjugend Rüegsbach zum diesjährige Chlousehöck zu üs i Clubrum iih. Das isch immer ä sehr lustige Abe mit hüüfig chli beschwipste Chlöis. Treffpunkt am 19:00 Uhr im Clubrum.

 

Après Ski Party: Fritig u. Samschtig, 14. u. 15. Dezember 2018

Ds ultimative Fescht vor Landjugend Frienisberg isch immer e Bsuech wärt. Am Samschtig Abe träffe mir üs am 21:00 Uhr im Clubrum und gö de grad zämä nach Ortschwabe.

 

Treberwurst Essen: Fritig, 14. Dezember 2018

Mir gö ds Amsoldinge ga Treberwurst ässe. Ds isch ä Waadtländer Saucisson wo uf Trube zuebereitet wird. Treffpunkt am 18:30 Uhr im Boll. Amäude bis am 7. Dezember bim Marc.

 

Kino mit Tina: Donnstig, 20. Dezember 2018

Mir wei zämä ds nöie Multiplex Chino ds Muri bi Bärn ga teste. Wele Fium mir gö ga luege und dr Treffpunkt wird no bekannt gäh.

 

Altjahrskegeln: Donnstig, 27. Dezember 2018

Dä Alass darf natürlech nid fähle. Mir träffe üs am 20:00 bir Chegubahn im Rössli Boll.

 

Clubraum putzen: Samschtig, 29. Dezember 2018

Dr Dräck wo mir ds ganz Jahr im Clubrum verursache mues o wieder wäg und drum si mir froh um müglechscht viu Häufer. Natürlech tüe mir de ono dr Bode fertig mache. Mir träffe üs am 10:00 im Clubrum.

 

 

Vorschou:

  • Ski Weekend: 25. – 27. Januar 2019

Amäude per sofort bim Marc

 


 

 --> Föteli vo Aläss bitte unbedingt ar Tina schicke.Lächelnd